ព័ត៌មានអំពីខេត្តប៉ៃលិន

ខេត្តប៉ៃលិន ជាខេត្តមួយឋិតនៅជ្រុងខាងជើងនៃជួរភ្នំក្រវាញ ត្រូវជាភាគខាងលិចនៃព្រះរាជាណាចក្រកម្ពុជា មានព្រំប្រទល់ជាប់ជាមួយប្រទេសថៃ។ ខេត្តនេះព័ទ្ធជុំវិញដោយខេត្តបាត់ដំបង និង ត្រូវបានផ្ដាច់ចេញពីខេត្តបាត់ដំបង ឱ្យក្លាយជាតំបន់រដ្ឋបាលដាច់ដោយឡែក បន្ទាប់ពីការចុះចូលរបស់ក្រុមលោកអៀង សារី នៅឆ្នាំ ១៩៩៦។

តំបន់ភ្នំ

ភ្នំយ៉ាត

ភ្នំយ៉ាតជាវត្តចាស់សាងសង់ឡើងជារបៀបវត្តកូឡា។ នៅលើភ្នំយ៉ាតគេឃើញមានសំនង់បូរាណដូចជា ចេនឡាមណីចេតីយ៍តូចធំ និង អាស្រមជាច្រើន។ ភ្នំយ៉ាតមានកាំជណ្តើរចំនួន ៤២កាំ ដែលកាំជណ្តើរនីមួយៗមានកំពស់ ២៥សង់ទីម៉ែត្រ។ ជណ្តើរនេះកសាងឡើងនៅថ្ងៃទី១៣ ខែតុលា ឆ្នាំ១៩៩៨។ ភ្នំយ៉ាតមានកំពស់ ៦០ម៉ែត្រ បណ្តោយ៧ ០០ម៉ែត្រ ទទឹង ៣០០ម៉ែត្រ និងក្រលាផ្ទៃ ៣០០០០ម២ ។

ភ្នំកុយ

ភ្នំកុយ ជាតំបន់ទេសចរណ៍ធម្មជាតិដែល មានសម្រស់ព្រៃប្រឹក្សា និងទឹកស្ទឹងមានលក្ខណៈធម្មជាតិពិតៗ។ តំបន់នេះមានចម្ងាយ ២០គ.ម ពីក្រុងប៉ៃលិន តាមផ្លូវស្ទឹងកាច់ ស្ថិតនៅក្នុងស្ថិតក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន។ តំបន់នេះសម្បូរទៅដោយដើមឈើវល្លិ៍ធំៗសម្រាប់ការសម្រាកលំហែរបស់អ្នកទេសចរណ៍។

តំបន់ទឹកធ្លាក់

ទឹកធ្លាក់ភ្នំខៀវ

រមណីយដ្ឋាននេះមានស្ទឹងធម្មជាតិទឹកថ្លា មានជ្រោះទឹកហូរធ្លាក់លើល្បាក់ថ្មដា យ៉ាងខ្ពស់ ខ្យល់អាកាសត្រជាក់ដល់ក្រអៅបេះដូងដែលធ្វើឲ្យភ្ញៀវទេសចរណ៍ជាតិ និងអន្តរជាតិ ទៅលេងសប្បាយរីករាយ។នៅតាមដងផ្លូវ ដែលហ៊ុមព័ទ្ធទៅដោយព្រៃឈើ ដែលដុះអមសងខាងផ្លូវចូលទៅកាន់រមណីយដ្ឋានភ្នំខៀវអូរតាវ៉ៅ ដែលមានព្រៃឈើខៀវស្រងាត់

ទឹកធ្លាក់បរហ៊ុយ

ភ្នំក្បាលដំរី ឬទឹកធ្លាក់បរហ៊ុយ មានសម្រស់ស្រស់ផូរផង់លាក់កំបាំងខ្លួនកណ្ដាលព្រៃ ប្រៀបដូចត្បូងមិនទាន់ច្នៃ។ដោយភ្ញៀវត្រូវធ្វើដំណើរដោយថ្មើរជើងរយៈពេល២ម៉ោង ក្នុងចម្ងាយផ្លូវ ៣ គីឡូម៉ែត្រ ទើបដល់ទឹកធ្លាក់ទី ៣០ ឬ ៣២។

ទឹកធ្លាក់ជ្រោះបរយ៉ាខា

រម្មណីយដ្ឋានធម្មជាតិទឹកធ្លាក់បរយ៉ាខា រមណីយដ្ឋាននេះ មានទេសភាពល្អ ស្រស់ស្អាតតាមបែបធម្មជាតិ ដោយមានទឹកជ្រោះថ្លាឆ្វេង ហូរកាត់ផ្ទាំងថ្ម ជាច្រើនដំណាក់ ជាមួយសម្រស់ធម្មជាតិនៅអមទឹកហូរ ដែលជាទីចាប់អារម្មណ៍សម្រាប់ភ្ញៀវទេសចរណ៍មកកំសាន្ត។