ភ្នំពេញ ៖ ក្រសួងធនធានទឹកនិងឧតុនិយមបានប្រកាសថា ស្ថានភាពទឹកទន្លេអាចនឹងចាប់ផ្តើមហក់ឡើងពីដើមខែសីហាខាងមុខនេះ ស្របពេលដែលសព្វថ្ងៃ ទឹកទន្លេបន្តស្រកយ៉ាងគំហុក ធ្វើឲ្យប្រជាកសិករព្រួយបារម្ភពីការខ្វះប្រភពទឹកប្រើប្រាស់ទាំងដំណាំ និងការធ្វើស្រែវចម្ការ។

លោក ចាន់ យុត្ថា នាយកខុទ្ទកាល័យ និងជាអ្នកនាំពាក្យក្រសួងធនធានទឹក និងឧតុនិយម បានបញ្ជាក់ឲ្យដឹងនៅព្រឹកថ្ងៃទី២៥ ខែកក្កដាថា តាមការព្យាករ កម្ពស់ទឹកជំនន់អាចនឹង ឡើងចាប់ពី៩ម៉ែត្រ៣០នៅទន្លេបាសាក់ចតុម្មុខ រហូតដល់ជាង១០ម៉ែត្រ ដែលបញ្ហានេះបានចាត់ទុកជាជំនន់ធំមួយ មានលក្ខណៈប្រសើរច្រើនដល់វិស័យកសិកម្ម ដោយសារទឹកបានហូរចូលតាមអូរ ស្ទឹង បឹង ព្រែកជាដើម។ លោកបន្តថា ចាប់ពីខែសីហានេះទៅ ទឹកជំនន់នឹងហក់ឡើងវិញជាបន្តបន្ទាប់ដោយសារមានភ្លៀងធ្លាក់ច្រើន នៅផ្ទៃរងទឹកភ្លៀងអាងមេគង្គលើ ដែលទទួលរងឥទ្ធិពលនៃប្រព័ន្ធសម្ពាធទាបនិងព្យុះរហូតដល់ខែសីហានេះ។ ការលើកឡើងរបស់ អ្នកនាំពាក្យក្រសួងធនធានទឹកនាពេលនេះ ឆ្លើយតបទៅនឹងក្តីកង្វល់របស់ប្រជាកសិករថា អាចនឹងប្រឈមដល់របរធ្វើស្រែចម្ការរបស់ពួកគាត់ នៅពេលខាងមុខនេះ ស្របពេលដែលស្ថានភាពទឹកទន្លេ កំពុងតមកពីទំព័រទី (1)ស្រក់ចុះ ហើយមិនទាន់ហូរចូលទៅតាមបឹងបួរនៅឡើយ។

លោកបានពន្យល់ថា ការស្រករបស់ទឹកទន្លេនាពេលនេះពុំមែនជាការស្រករហូតនោះទេដោយសារផ្ទៃរងទឹកភ្លៀងនៅមេគង្គលើក្នុងប្រទេសថៃ និងឡាវមិនទាន់ជួបឥទ្ធិពលព្យុះនិងប្រពន្ធ័សម្ពាធទាបនៅឡើយ។ លោក យឹម សុធារ៉ាត់ មន្ត្រីផ្នែកកសិកម្មរាជធានីភ្នំពេញបានបញ្ជាក់ថា ប្រសិនបើទឹកទន្លេមានជំនន់ធំតាមការព្យាកររបស់ក្រសួងធនធានទឹកមែននោះកសិករនឹងងាយស្រួលក្នុងការធ្វើរបបកសិកម្ម ដាំដុះទៅវិញ ដោយសារមានទឹកគ្រប់គ្រាន់ ចំណែកដីមានសំណើមជាប់ប្រចាំមានជីជាតិល្អ ដែលធ្វើឲ្យដំណាំរបស់ប្រជាកសិករទទួលបានទិន្នផលខ្ពស់។

លោកបានរំលឹកថាកាលពីឆ្នាំ២០១៥កន្លងទៅ ស្ថានភាពទឹកមានលក្ខណៈតូចធ្វើឲ្យប្រជាកសិករមួយចំនួន ពុំបានប្រកបរបរធ្វើស្រែឡើយ។ ចំណែកធ្វើស្រែវិញ ក៏ពុំទទួលបានផលច្រើនដែរ ដោយវាមិនត្រឹមតែគ្មានទឹកគ្រប់គ្រាន់ក្នុងការស្រោចស្រពប៉ុណ្ណោះទេ ប៉ុន្តែវាសម្បូរទៅដោយសត្វចង្រៃជាច្រើន ដែលបំផ្លាញដំណាំរួមជាមួយនឹងដីខ្សោះជីជាតិទៀតផង។ ទោះជាយ៉ាងណាក៏ដោយ មន្រ្តីក្រសួងធនធានទឹក បានអះអាងថា បើជាការព្យាករពីស្ថានភាពទឹកជំនន់មានភាពអំណោយផលល្អ លើវិស័យកសិកម្ម ក៏ក្រសួងពុំនៅស្ងៀមដែរ គឺបានត្រៀមរៀបចំផែនការ ទុកដាក់ទឹកតាមរយៈ ការស្ទាក់បញ្ចូលទៅ តាមព្រែក ប្រឡាយ អាង កុំឲ្យទឹកហូរចេញទៅវិញបានដែរ នៅពេលរដូវទឹកស្រក់នោះ ដើម្បីផ្គត់ផ្គង់ទឹកសម្រាប់បងប្អូនប្រជាកសិករក្នុងការដាំដុះដំណាំកសិកម្មធ្វើស្រែចម្ការឲ្យបាន គ្រប់គ្រាន់នៅពេលរដូវបង្កបង្កើនផល៕