នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជាបានថ្លែងថា សម្តេចធ្លាប់បានឆ្លងកាត់ការលំបាកគ្រប់យ៉ាងក្នុងវ័យកុមារ ពេលដែលស្រុកជួបសង្រ្គាម ពេលនោះឱកាសនៃការសិក្សាគឺគ្មានទេ មានតែការរត់លូនគេចពីគ្រាប់កាំភ្លើង។ សម្តេចតេជោបានអះអាងថាពេលសម្តេចមានឱកាសកសាង ប្រទេសជាតិសម្តេចមិនឲ្យកូនខ្មែរអត់សាលារៀនឡើយ។

សម្តេចតេជោនាយករដ្ឋមន្រ្តីបានថ្លែងនៅក្នុងហ្វេសប៊ុករបស់សម្តេចនាព្រឹកថ្ងៃទី២៩ ខែកក្កដា នេះបន្ទាប់ពីបានចំណាយពេលវេលា៣ថ្ងៃ ធ្វើដំណើរតាមរថយន្តទៅកាន់ខេត្តភូមិភាគឦសានចំនួនពីរ គឺខេត្តស្ទឹងត្រែង និងខេត្តក្រចេះ ដែលនៅទីនោះសម្តេចបានផ្តល់សាលារៀនចំនួន ៥ខ្នង ១ខ្នងនៅក្នុងខេត្តស្ទឹងត្រែង និង៤ខ្នងនៅក្នុងខេត្តក្រចេះ។ នៅក្នុងខេត្តស្ទឹងត្រែងសម្តេចតេជោនាយករដ្ឋមន្រ្តី បានជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្សសាលាបឋមសិក្សាសាមគ្គីអភិវឌ្ឍន៍ ដែលបានឈររង់ចាំស្វាគមន៍នៅតាមផ្លូវធ្វើដំណើរលើផ្លូវជាតិលេខ៧ ក្នុងភូមិសាស្រ្ត ភូមិរាជានុកូល ឃុំរាជានុកូល ស្រុកស្ទឹងត្រែង ខេត្តស្ទឹងត្រែង នៅទីនោះសម្តេចបានផ្តល់អគារសិក្សាមួយខ្នង ៦បន្ទប់។ នៅក្នុងខេត្ត ក្រចេះ សម្តេចតេជោនាយករដ្ឋមន្រ្តីបានជួបសំណេះសំណាលជាមួយលោកគ្រូអ្នកគ្រូ និងសិក្សានុសិស្ស ក្នុងវិទ្យាល័យថ្មគ្រែ នៅទីនោះសម្តេចបានផ្តល់អគារសិក្សា១ខ្នង២ជាន់១២បន្ទប់ និងបានចុះ ជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សនៅសាលាបឋម និងអនុវិទ្យាល័យក្រចេះក្រុង ក្នុងខេត្តក្រចេះ សម្តេចបានផ្តល់អគារសិក្សា៣ខ្នង ដែលសង់ឡើងជារាងអក្សរ អ៊ុយ កម្ពស់៣ជាន់មាន៤៨បន្ទប់ ។ នៅក្នុងហ្វេសប៊ុកសម្តេចតេជោនាយករដ្ឋមន្រ្តីបានមានប្រសាសន៍ថា៖ “ទោះបីហត់នឿយប៉ុណ្ណា នៅពេលបានជួបមុខកូនក្មួយ គឺពិតជាសប្បាយចិត្តខ្លាំងណាស់។ ខ្ញុំបានចុះពិនិត្យសមិទ្ធផលសាលារៀននិងបានស្តាប់របាយការណ៍ដោយផ្ទាល់ពីក្មួយៗនិងលោកគ្រូអ្នកគ្រូនៅទីនេះ។ ខ្ញុំសូមកោតសរសើរចំពោះការរីកចម្រើនវិស័យអប់រំរបស់យើង តាំងពីទីក្រុងដល់តាមបណ្តាខេត្ត។ ដោយសារកំណើនសិស្សនិងសេចក្តីត្រូវការចាំបាច់នូវអគារសិក្សាបន្ថែម ខ្ញុំនិងសប្បុរសជនមួយចំនួនបានសម្រេចចិត្តធ្វើអំណោយសាលារៀនថ្មីមួយខ្នងមាន៣ជាន់ ស្មើនឹង៤៨បន្ទប់ជូនដល់កូនក្មួយសិស្សានុសិស្សនៅទីនេះ”។ សម្តេចតេជោមានប្រសាសន៍ថា៖ «ខ្ញុំធ្លាប់បានឆ្លងកាត់ការលំបាកគ្រប់យ៉ាងកាលពីខ្ញុំនៅវ័យកុមារ ក្នុងពេលដែលស្រុកយើងមានសង្រ្គាម។ ពេលនោះ ឱកាសនៃការសិក្សាគឺគ្មានទេ មានតែការរត់លូនគេចពីគ្រាប់កាំភ្លើង។ នៅពេលដែលខ្ញុំមានឱកាស គឺខ្ញុំមិនឲ្យកូនខ្មែរអត់សាលារៀនឡើយ។ សូមក្មួយៗបន្តខិតខំរៀនសូត្រ ដើម្បីក្លាយទៅជាកូនល្អ និងធនធានល្អ របស់ប្រទេសជាតិ និងដើម្បីអនាគតល្អរបស់ក្មួយៗផ្ទាល់»៕