រដ្ឋមន្ត្រីការបរទេសអាម៉េរិក លោក ចន ឃើរី បាននិយាយកាលពីថ្ងៃអង្គារម្សិលមិញថា លោកគាំទ្រឱ្យមានការបន្តកិច្ចពិភាក្សាទ្វេភាគី រវាងចិននិងហ្វ៊ីលីពីនទៅលើបញ្ហាសមុទ្រចិនខាងត្បូង បន្ទាប់ពីមានសេចក្តីសម្រេចរបស់តុលាការអន្តរជាតិ។

រដ្ឋមន្ត្រីការបរទេសចិន លោក វ៉ាង អ៊ី បានសុំទៅលោក ចន ឃើរី ឱ្យផ្តល់ការគាំទ្រដល់កិច្ចពិភាក្សាចាប់ផ្តើមឡើងវិញ រវាងទីក្រុងម៉ានីលនិងទីក្រុងប៉េកាំង នៅក្នុងកិច្ចប្រជុំមួយរវាងលោកទាំងពីរនៅ ក្នុងទីក្រុងវៀងចន្ទន៍ ប្រទេសឡាវ។

លោក ចន ឃើរី បាននិយាយនៅក្នុងសន្និសីទកាសែតថា" លោក រដ្ឋមន្ត្រីការបរទេសចិនបាននិយាយថា ពេលវេលាបានមកដល់ហើយ ត្រូវតែដកចេញភាពតានតឹងជាសាធារណៈ ហើយងាកមកកាន់ ទំព័រថ្មី ហើយយើងយល់ស្របតមកពីទំព័រទី (1)ចំពោះបញ្ហានោះ ប្រទេសប្រកាសសិទ្ធិផ្សេងទៀតមិនត្រូវធ្វើសកម្មភាពបង្កហេតុធ្វើឱ្យកើនឡើងភាពតានតឹងនោះទេ"។

លោក ចន ឃើរី បាននិយាយថា លោកនឹងលើកទឹកចិត្តដល់ប្រធានាធិបតីហ្វ៊ីលីពីនលោក រ៉ូឌ្រីហ្គោ ឌូទែរតេ ដើម្បីឱ្យលោកទទួលយកកិច្ចសន្ទនានិងការចរចាជាមួយប្រទេសចិននៅពេលដែលលោក ទាំងពីរជួបគ្នានៅទីក្រុង ម៉ានិល នាថ្ងៃពុធនេះ ដោយលោក ឃើរី នឹងចាកចេញពីប្រទេសឡាវទៅកាន់ហ្វ៊ីលីពីន នៅយប់ថ្ងៃអង្គារ។ ប្រទេសចិនបានច្រានចោលសេចក្តីសម្រេចចិត្តរបស់តុលាការអន្តរជាតិ ដោយ ចាត់ទុកថា មិនត្រឹមត្រូវតាមច្បាប់ប៉ុន្តែ លោក ឃើរី និយាយថា សហគមន៍ អន្តរជាតិរួមមានអាម៉េរិកចាត់ទុកសេចក្តីសម្រេចចិត្តនោះថា ជាផ្លូវច្បាប់មិនអាចចាត់ទុកជាមោឃៈបានទេ វាជាបញ្ហាច្បាប់។ លោកបាននិយាយថា "ដូច្នេះយើងត្រូវតែធ្វើការងារនៅចំពោះមុខយើងត្រូវតែធ្វើឱ្យប្រាកដថា យើងកំពុងដោះស្រាយបញ្ហាតាមរយៈមធ្យោបាយការទូត និងនិតិរដ្ឋ"។

ប្រទេសចិនបានទទួលជ័យជម្នះផ្នែកការទូតកាលពីថ្ងៃចន្ទ នៅពេលដែលអាស៊ាន បានទម្លាក់ចោលសេចក្តីសម្រេចចិត្តរបស់តុលាការមិនបញ្ចូលទៅក្នុងសេចក្តីថ្លែងការណ៍រួម។ និយាយទៅកាន់អ្នកកាសែតក្នុង ទីក្រុងវៀងចន្ទ រដ្ឋមន្ត្រីការបរទេសហ្វ៊ីលីពីន លោក ពែរហ្វិកតូ យ៉ាសៃ បាននិយាយថា ជម្លោះនោះមិនមែនជាការប្រយុទ្ធរវាងចិន និង សហរដ្ឋអាមេរិកទេ តែវាជាជម្លោះរវាងចិន និងហ្វ៊ីលីពីន។ លោកបានបន្តថា "យើងនឹងស្វែងរកឱ្យមានទំនាក់ទំនងទ្វេភាគីដើម្បីដោះស្រាយដោយសន្តិវិធីចំពោះជម្លោះដែលជាប់ពាក់ព័ន្ធរវាងចិន និងហ្វ៊ីលីពីន។ ប្រទេសដទៃទៀតមិនជាប់ពាក់ព័ន្ធជាមួយជម្លោះនេះទេ"៕ (លោក នរៈ)