ប្រភពប៉ូលិសមួយរូបបានប្រាប់ទីភ្នាក់ងារព័ត៌មានចិនស៊ីនហួថា ចំនួនអ្នកស្លាប់ពីការវាយប្រហារដោយគ្រាប់បែកអត្តឃាត ដែលបានប្រកាសដោយរដ្ឋអ៊ិស្លាម (IS) ក្នុងរដ្ឋធានីបាកដាដ របស់ប្រទេសអ៊ីរ៉ាក់កាលពីថ្ងៃអាទិត្យបានឡើងដល់២១នាក់ នឹង៣៥នាក់ទៀតរបួស។

ប្រភពនោះបាននិយាយជាអនាមិកថា សេចក្តីរាយការណ៍ថ្មីបំផុតរបស់យើងបាននិយាយថា មនុស្ស២១នាក់បានស្លាប់នឹង៣៥នាក់ទៀតរបួស នៅក្នុងការបំផ្ទុះគ្រាប់បែកអត្តឃាតក្នុងសង្កាត់កាឌ្មីយ៉ា។

ប្រភពនោះបាននិយាយថាការផ្ទុះដ៏ខ្លាំងបានកើតឡើងក្នុងអំឡុងពេលព្រឹកដែលមមាញឹកនៅពេលដែលអ្នកបំផ្ទុះគ្រាប់បែកអត្តឃាតម្នាក់បានបំផ្ទុះអាវកាក់មានគ្រឿងផ្ទុះរបស់គាត់នៅឯចំណុចឆែកឆេរមាន មនុស្សកុះករមួយក្បែរធ្លា Adan នៅឯច្រកចូលនៃសង្កាត់ស៊ីអ៊ីតកាឌី្មយ៉ា។

ប្រភពនោះបាននិយាយបន្ថែមថា ការផ្ទុះនោះបានធ្វើឱ្យឆេះរថយន្តស៊ីវិល ដែលនៅក្បែរនោះជាច្រើនគ្រឿង ព្រមទាំងធ្វើឱ្យខូចខាតច្រើនគ្រឿងទៀត ព្រមជាមួយការបំផ្លាញផ្នែកនៃអគារចំណុចឆែកឆេរនោះ។ ក្រុមសកម្មប្រយុទ្ធរដ្ឋអ៊ិស្លាម (IS) បានចេញសេចក្តីថ្លែងការណ៍មួយដែលប្រកាសទទួលខុសត្រូវចំពោះការវាយប្រហារនៅកណ្តាលក្រុងបាកដាដនេះ។

តាមសេចក្តីរាយការណ៍ប៉ូលិសពីមុនឱ្យដឹងថា កាលពីព្រឹកថ្ងៃដដែលនោះ ប្រភពនោះបានដាក់ចំនួនស្លាប់ថា មាន១៤នាក់ នឹង២០នាក់របួសក្នុងការផ្ទុះនៅកាឌ្មីយ៉ា។ ប្រទេសអ៊ីរ៉ាក់ត្រូវបានវាយប្រហារដោយរ លកថ្មីនៃអំពើហិង្សាចាប់តាំងពីក្រុមភេរវជន IS បានធ្វើការត្រួតត្រាផ្នែកនានានៃតំបន់ភាគខាងជើងនិងភាគខាងលិច កាលពីក្នុងខែមិថុនា ឆ្នាំ២០១៤។ មនុស្សជាច្រើនបានស្តីបន្ទោសអស្ថិរភាពរាំរ៉ៃបច្ចុប្បន្ន អំពើហិង្សាវិលចុះវិលឡើងព្រមទាំងការលេចឡើងក្រុមជ្រុលនិយមដូចជា IS ជាដើមទៅលើ ស.រ.អា ដែលបានចូលលុកលុយ នឹងកាន់កាប់ប្រទេសអ៊ីរ៉ាក់កាលពីក្នុងខែមីនា ឆ្នាំ២០០៣៕ (លោក មឿន)