ឋានសួគ៍ បូកគោ
ភ្នំបូកគោមានទីតាំងស្ថិតនៅប្រមាណ៤២គីឡូម៉ែត្រពីទីរួមខេត្ត។ រមណីយដ្ឋាននេះបានកសាង ឡើងដោយអាណានិគមនិយមបារាំងនៅឆ្នាំ១៩២២ ក្នុងរជ្ជកាលព្រះបាទស៊ីសុវត្ថិ។ ភ្នំបូកគោគឺជាកន្លែងកម្សាន្ត សម្រាប់ពួកអាណានិគមបារាំង ដែលត្រូវការផ្លាស់ប្តូរបរិយាកាសពីតំបន់វាលទំនាបទៅតំបន់ភ្នំក្បែរមាត់សមុទ្រ។ បុរីបូកគោមានកម្ពស់១០៧៥ម៉ែត្រ ដែលមានអាកាសធាតុអំណោយផល និងទេសភាពដ៏ត្រកាល។ ដើមឈើធំៗដែលផ្តល់ម្លប់ដ៏ត្រឈឹងត្រឈៃ ទឹកជ្រោះ និងព្រៃភ្នំក្រំថ្មគិរីបុព្វតាដែលមានសត្វម្រឹគីម្រឹគានិងបក្សាបក្សីជាច្រើន គួរជាទីចាប់ចិត្តដិតអារម្មណ៍ដល់អ្នកទេសចរ។ នៅពេលឡើងដល់កំពូលភ្នំ អ្នកទេសចរអាចមើលឃើញក្រុងកំពត ឆ្នេរកែប ខេត្តព្រះសីហនុ និងទឹកសមុទ្រពណ៌ខៀវស្រងាត់។ ដោយមានចម្ងាយ៧គីឡូម៉ែត្រពីបុរីនេះ កន្លែងដែលអាចហែលទឹកបានស្ថិតនៅឯទឹកធ្លាក់ពពកវិល។ អ្នកទេសចរអាចងូត និងហែលទឹកលេងកម្សាន្តនៅទីនោះបានផងដែរ៕
ប្រវត្តិវត្តសំពៅប្រាំ នៅលើភ្នំបូកគោ
វត្តសំពៅប្រាំស្ថិតនៅទីខ្ពង់រាបនៅលើភ្នំបូកគោក្នុងខេត្តកំពតដែលសព្វថ្ងៃនេះបានក្លាយជា កន្លែងទេសចរណ៏សម្រាប់ ស្រូបយកខ្យល់អាកាសបរិសុទ្ធ និងមានទេសភាពស្រស់ស្អាត ហើយអ្នកដំណើរអាចទៅកំសាន្តទីនោះ តាមផ្លូវជាតិលេខ៣ពីភ្នំពេញទៅភ្នំបូកគោមាន ចម្ងាយ១៨៩គីឡូម៉ែត្រ តែបើគិតពីផ្លូវកំពត-វាលរិញ មានចំនួន ៣២ គីឡូម៉ែត្រ។ពីដើម ភ្នំបូកគោជាកន្លែងយកខ្យល់អាកាសសម្រាប់ជនជាតិអ៊ឺរ៉ុប ដែលជាអាណាព្យាបាល ស្រុកយើង គឺលោកហ្វ្រង់ស្វា-បូដ្វាំងជារេស៊ីដង់សុប៉េរេយើ នៅប្រទេសកម្ពុជាបានចាត់ កសាងហើយសម្ពោធផ្លូវការកាលឆ្នាំ១៩២៥ក្នុងរជ្ជកាលព្រះបាទស៊ីសុវត្ថិ។កាលពីសម័យ កសាងនោះដោយទ្រង់ យល់ថាបារាំងរៀបចំធ្វើជាទី សំណាក់អាស្រ័យយកធាតុត្រជាក់ សម្រាប់ពួកគេ ដូច្នេះ ព្រះមហាក្សត្រខ្មែរយើងក៏ព្រះអង្គ ទ្រង់ព្រះតំរិះដល់ព្រះពុទ្ធិសាសនា ភ្លាមដែរ គឺព្រះអង្គទ្រង់សាងអារាមមួយ ដែលមានកូនវិហារតូចមួយនឹងចេតិយឡើង មួយ។សំណង់វត្តនេះតាំងលើដីខ្ពស់ ជាកំពូលភ្នំដ៏មានផែនថ្មធំៗ នៅពាសពេញចម្លែកជាង គេគឺផែនថ្មជាបន្ទះៗ មានទំហំបណ្តោយ១០ម៉ែត្រ និងកំពស់ ១០ម៉ែត្រ។ ទ្រង់ទ្រាយផែនថ្មនេះ មានភាពសំប៉ែតខ្ពស់ ទ្រទុងនៅតំរៀបគ្នាជាប្រាំសន្លឹក មានសណ្ឋានដូចជាក្តោងសំពៅត្រដាង។ ឃើញរូបភាពនៃផែនថ្មទាំងប្រាំផែននេះហើយ មានសណ្ឋានដូចសំពៅ៥ កំពុងបើកក្តោង និងការកសាងក៏ត្រូវធ្វើនៅ ជាប់ផែនថ្មនេះទៀត ទើបអ្នកផងទាំងពួងហៅទីនេះតាមសន្មត់ថា “វត្តសំពៅប្រាំ”។
